由郑丹瑞（旦哥）与卢慧敏（Amy）主演的寰亚电影《得宠先生》，昨日（9日）与香港爱护动物协会（SPCA）于将军澳康城的戏院，举行两场「狗狗友善慈善放映会」，逾百位观众带埋宠物狗排排坐一齐睇戏，SPCA会长傅明宪更身体力行，带埋三只爱犬撑场。两位导演兼编剧李志伟和何英毅、旦哥、Amy、SPCA代表Jenmon、狗演员Little的主人 Suki 等，亲身到戏院谢票和分享，还感动到热泪盈眶。
旦哥一度哽咽：「香港拍电影已经好难，仲要拣个咁难嘅题材。但正正就系难，香港电影越难越唔忿气，先至会有大大小小嘅电影产生。」工作人员递上纸巾，他说：「好少何谢票谢到咁鬼样！」观众笑声。他说：「最感动系『人宠共融』，我嘅电影可以做到，大家带住心爱嘅毛孩，好enjoy 咁睇咗107分钟，多谢大家！」观众席有狗吠了两声回应，旦哥笑说：「我明，你系话『唔好客气』！」
而唐狗演员Little早前因病去逝，主人Suki 昨日表示好开心在电影裏再见到Little，她感谢拍摄期间，团队对Little的照顾和爱护。
接受访问时Amy说：「我一入戏院，见到人狗同场嘅画面已经眼湿湿，因为拍呢部电影最大嘅讯息系平等对待生命，所以见到大家一齐坐、一齐睇戏，真系将毛孩变成家人，我好感动！」
旦哥说：「我做过无数次其他电影嘅谢票，每次我都好兴奋，希望令现场气氛高涨。但今次，系第一次，工作人员要递纸巾俾我抹眼泪。狗同小朋友系最难拍，导演连跨两个难关，我有幸同佢哋一齐走过难关，完成呢件事。然后见到制成品，有毛孩有主人一齐睇、一齐拍手掌，同喜同悲，系我最大最大满足感。」本身对狗毛敏感的旦哥说：「我所有嘅敏感，都唔及我嘅满足感！」还说：「我契仔带咗狗狗入场睇，佢话狗仔好似识睇字幕，好认真咁睇戏，个画面好美丽。」Amy补充：「我哋同观众都眼湿湿，证明呢个画面真系好有温度。」旦哥点头贊成，说：「证明我哋做啱咗！」
散场后戏院内更热鬧，不少主人都带埋狗狗跟Amy合照留念，超爱动物的她来者不拒，甚至抱起小狗和蹲在地上跟大狗合照，狗狗对她亦非常热情，狂舔她下巴和脸庞索吻，Amy好享受，兴奋高唿：「我第一次畀咁多狗锡锡，今日真系好幸福呀！」
有观众完场跟旦哥表示代入了他演的「佳叔」角色，甚至忘记他在演戏，旦哥说：「我实在有努力过！好想大家睇到嘅唔系郑丹瑞，而系角色，一个独居老人。戏中有一句对白令我特別心痛『连人我都唔要做朋友，做乜同狗做朋友？』一个老人家去到咁苍凉。所以我哋都要留意身边嘅老人家，打个电话去关心佢！」Amy亦表示因为这部电影才接触关于独居长者的问题，她说：「香港人无论咩年纪，都好似缺少咗表达自己嘅习惯，然后就有误解。《得宠先生》除咗系一部讲流浪动物嘅电影之外，仲系讲每一段关系，都应该多啲沟通、了解和包容。」
