唱作歌手陳健安（安仔）昨日聖誕節正日，為近日推出的第四張個人概念專輯「PROJECT REJECT」，於將軍澳MCP新都城中心舉行新碟簽唱會，逾300族人（安仔的粉絲暱稱）排長龍，他現場演唱專輯內新歌《戀愛腦之死》和《當我們返回現世》，全場大合唱。之後更驚喜送出親手夾到的公仔，讓現場觀眾搶答問題得獎，其中有兩位小族人獲得，安仔親自落台送禮物和合照留念。
踏入聖誕節，安仔立即收到好消息，他說：「今朝一早起身就收到公司通知，新專輯登上銷量冠軍，好開心，多謝每位買實體碟嘅樂迷！」近年愛上夾公仔的他，上周舉辦活動與粉絲一齊做善事，他說：「今次同夾公仔店合作，將我部份夾到嘅公仔攞出嚟畀大家夾，活動今日結束，籌到五位數字捐出慈善機構。」他又透露日前不慎咬崩大牙，幸好有牙醫朋友幫忙，聖誕節才可以繼續去Party大吃大喝。
簽唱會開始，安仔在台上親自解構新專輯「PROJECT REJECT」以「拒絕」做主題，並透露要親手撕開包裝才可獲得CD的設計概念。他說：「去年頒獎禮我喺台上講咗三句說話『唔好死』、『唔好畀人睇死』、『爭氣』，成為咗呢張專輯嘅核心價值。慢慢學習『拒絕』後，成個人都自在咗，坦白係保護最真實嘅自己。當你向別人坦白自己嘅喜惡，對方就知道你嘅底線、為人，佢就會學識點樣去尊重你。」對於特別的包裝設計，安仔說：「我搞咗個『網上撕紙會』，希望大家用自己嘅方法撕開，最重要嘅嘢靠自己去攞，希望呢張碟同大家有互動，你都係呢張實體專輯嘅創作者。」
