唱作歌手陳健安今年第三首派台歌《沒有時間》MV昨晚（14日）上架，歌詞意思是失去愛仿如時間停頓，歌名來自安仔6年前單飛第一首歌《一吻穿越四十六億歲》的其中一句歌詞。為配合今年以「後末日」主題的音樂企劃，《沒有時間》MV故事設定在「磒石撞地球」前一刻，安仔突然被張惠雅（Regen）飾演的女友狠飛。他一邊執行李逃難，一邊回憶已逝去的甜蜜片段，情緒一觸即發，安仔眼淚放題，喊到連攝影師都話替他心痛，導演Oscar更考慮將這段輯成番外篇！
安仔演技大爆發，一鏡到底，完美演繹否認、憤怒、討價還價、抑鬱和接受「分手五階段」。事後他冷靜情緒，說：「我完全唔知頭先發生咩事，一聽到音樂就係咁喊。Oscar話我演繹晒成首歌，一take過，可以獨立輯成一個MV。」他表示事前沒有想過自己會爆喊，說：「之前開會大家有討論過，啱啱被分手嘅人應該未接受到現實、未太傷心，但剛才我唔知點解就崩潰咗！情緒就係咁，以為自己控制到，但係突如其來嘅一啲氣氛，例如望住Regen著過嘅衫、慶祝生日嘅布置、一齊夾嘅公仔，腦裏面好多畫面，情緒就來了！」
《沒有時間》由徐繼宗作曲、Oscar填詞、賴映彤編曲，並與安仔一同監製。每年安仔都會為歌曲和MV企劃設定主題，他透露今次主題與後末日的時空有關。歌名都改過幾次，他說：「最後敲定《沒有時間》，來自我單飛後第一首派台歌《一吻穿越四十六億歲》其中一句歌詞，『時間』喺嗰首歌裏面表達『當愛情來臨，時間再冇意義，只要享受當下嘅愛』，但其實分手嗰一刻好傷心，《沒有時間》就係講失去愛嘅時候，其實都好似時間停頓，甚至忘記時間嘅存在。」
安仔說：「今次MV故事係講一對情侶，面對殞石即將要撞落地球嘅時候，人去到盡頭就好想坦白，而Regen就對我坦白咗一件事，簡單啲講我係『被分手』。」之前Regen已在安仔的《我違和但我不糾正》MV演出，私下亦是好朋友，今次MV拍攝溫馨拍拖情景時，他們都表現非常自然和投入。曾患腳傷的安仔更二話不說孭起Regen街上跑，他說：「之前都有啲擔心，因為我腳傷之後未試過負重呢個磅數，原來佢咁輕！平時Regen拍戲都喜感較重，大家好少見佢演認真嘅角色，但我之前睇過佢演舞台劇，其實佢有呢一面。」除了幕前演出，安仔還感謝Regen為MV拍攝團隊親自下廚準備膳食，台前幕後都吃得津津有味。
