踏入2025年3月，寰亚唱作王子Jay Fung冯允谦终于迎来首支派台作《然之后》，由Jay与合作无间的T-Ma联合作曲，还有首度合作的小克负责填词，歌词讲述人生经常面对不同的高低起跌，要学懂去接受、面对、放手。
「人生好多事情会不断变，当下你拥有的一切，下一秒便有可能失去，如果大家有睇过个MV，第一幕会见到男主角递辞职信，原来佢患咗重病，要做一个大手术，但佢人生仲有好多梦想未完成，但因为呢个病，未来嘅路令佢存在好多变数，MV最后一幕，佢同一个小朋友倾偈，其实个小朋友系佢自己，代表佢搵番自己嘅初心。」
今次MV，Jay Fung找来合作无间的Maggie执导，陈健朗担任MV男主角，Jay Fung认为由对方出演，比自己更胜任。「今次好幸运，搵到陈健朗去演男主角，点解我自己唔拍？因为首歌想带出嘅讯息比较沉重，希望大家睇到MV嘅时候会有一个好深嘅感受，所以起用专业嘅演员演出，我觉得比较适合。」
入行超过十年，Jay Fung在唱作路上曾经面对过不少起跌，每当遇上难关，总要学懂自己一个去面对。孤单，并不可怕，Jay坦言，有时候会很享受孤单带来的平静。
「通常当全日工作完成回到家中，同屋嘅孖生细佬刚巧外游，会有一种孤单嘅感觉，但当年纪日渐长大，会喜欢自己一个，喜欢嗰份自由、平静，我系一个比较情感丰富嘅人，无论开心抑或唔开心，又或者好多嘢谂，都会锺意行吓海旁，又或者同朋友、屋企人、细佬倾偈，尤其当个脑好多嘢谂，要想办法释放，行海旁可以令自己得到平静，喜欢用呢种方法去开解自己，重新整理内心。」
Jay的新歌《然之后》正正就是想带出，无论人生遇到任何起起跌跌，要学识接受、面对，谂办法放下，如小克的歌词内所说：「然后好好惨败 然后好好长大 然后充满力气好好 欣赏美梦瓦解。」
「我身为一个唱作歌手，好多时一个人喺屋企写歌，当灵感一到，便会花上八、九、十小时埋头创作，而创作嘅过程，要不断思考、重整，一个人静落嚟，会好多嘢谂、好多嘢想讲、好多感受，先可以激发到创作灵感，希望《然之后》呢首歌，大家多多支持，除咗听歌，仲可以上网睇个MV。」Jay说。
