「唱作王子」馮允謙（Jay）日前現身香港知專設計學院，在被喻為「黑膠聖地」的「V Music Library」做1日店長，半百fans捧場，Jay與黃志淙博士分享自己的唱作人生，見到現場咁多黑膠碟時，坦言好想推出屬於自己的黑膠碟。
Jay踏入「V Music Library」雙眼發光，就像一個進入遊樂場的小朋友般興奮，他讚嘆：「呢度幾乎收藏咗歷史以嚟所有廣東歌手嘅作品，可以欣賞唔同類型嘅廣東歌。」 當他見到現場有大量的黑膠唱片，說：「見到咁多黑膠碟，搞到我都好想出番張黑膠碟。」現場粉絲和樂迷聽到立刻起哄，黃志淙隨即鼓勵Jay推出黑膠唱片，搞到他都心郁郁說：「真係可以諗吓！」
Jay Fung即場跟大家分享喜愛的音樂，其中就有殿堂級樂隊「The Beatles」的經典金曲《Let it Be》，他說：「記得喺課室第一次聽到呢首歌時，我係聽到即刻喊，唔識得形容嗰刻心情，真係好心痛，呢隻歌好觸動到我心，所以今日都好想同大家分享，呢隻歌嘅歌詞好簡單、好易明，但係亦有好多意思喺裏面，雖然有啲歌詞係重複咗，但係好有意思。」
提到Jay平日寫歌的小習慣，原來有時他先會寫完旋律，但未必即時想到歌曲內容，而他除了會做資料搜集外，還會用一個方法搵題材，「有時寫歌我會瞌埋眼，瞓喺床度同自己傾吓偈，諗吓自己有咩想講。」所以Jay好重視私人時間，笑言不用出外工作就在家做「宅男」。
